Björkip Islandimi isumalluutit pinngortitameersut illersorpai

Erinarsortartormi taanna 44-inik ukiulik isumaqarpoq aningaasaliisartut Islandimi aningaasarsiornikkut ajornartorsiorneq iluaqutsiullugu atornerluiniarsarisut.

Björk paasisitsiniaalluni aallartippoq, ilaatigut Canadamiut nukissiuuteqarfiat Magma Energy persaralugu, taakkumi Islandimi nukissiuuteqarfik HS Orka, Islandimi puilasunik kissartunik atorluaaniarnermik ingerlataqartoq, ingerlatilerusummassuk.

- Orka tunineqassappat, tamanna suliffeqarfinnut nunani tamalaani ingerlatsisunut, Islandimi imermik tuniniaanermik pisuussutinillu allanik ingerlatserusuttunut, ajornannginaarlugulu aningaasarsiorusuttunut ammaassissaaq, Björk Islandimi tusagassiorfinnut arlalinnut taama oqarpoq.

Björkip oqaatigaa, Canadamiut piserusuttut Islandimi nukissiuutit tamaasa pisiariniarsarigaat.

Canadamiut piserusuttut oqaaseqartitaata oqaatigaa, taamatut oqaatigineqarnertik ilumuunngitsoq, oqaatigalugulu Islandimiut suliffeqarfiata ilaannaata pisiarinissaa kisimi pilersaarutaasoq, taamatulli niuernissamut akerliusut oqaatigaat, Canadamiut nukissiuuteqarfiata Magmap, Islandimi aningaasarsiornikkut ajornartorsiorneq atornerlunniarsarigaa.

Niueqatigiinniarneq Islandimi naalakkersuisoqatigiit maanna misissuiffiginialerpaat.