Björk pinngortitaq pillugu tusarnaartitsissaaq
Tusarnaartitsineq ateqarpoq Náttura, ilaatigut pinngortitaq pillugu paasititsiniaanermut tunngatinneqarluni.
Pinngortitaq pillugu paasititsiniaalluni tusarnaartitsinermi ilaatigut Alcoap Islandimi aluminiulerfiliornissaanut sammitineqarpoq.
- Maannakkut pingasunik aluminiumik aatsitsiveqarpugut, taakkulu Europami annerit ilagaat, ukiullu pingasut qaangiutsinnagit allanik aamma aatsitsiviliornissaq pilersaarusiorneqartussaavoq. Islandimiorpassuit tamatumunnga akerliupput. Suliffeqarfeerarpassuarnik ineriartortitsissapput namminneq pissaminnik namminnerlu aningaasaat iluanaarutitik pigiinnarumagamikkik, Björk atuagassiami The Times-imi allaatigineqartumi taama oqarpoq.
Tusarnaartitsilluni paasititsiniaanermi siunertarineqarpoq tunngaviusumik piujuaannartussanillu suliffeqarfeeqqanik ineriartortitsinissaq.
Qarasaasiami nittartakkami uani www.nattura.info, tassani inuit kaammattorneqarput isummaminnik saqqummiussueqqullugit, ilaatigut Islandimiunut suliffinnik mingutsitsinngitsunik qanoq ililluni pilersitsisoqarsinnaanersoq. Björkip Radiohead Thom Yorke suleqatigalugu Náttura saqqummersippaa.
