Biskoppi: Susassareqatigiinnerusa
Nunatta Biskoppia Sofie Petersen pisarnermisut nunatta domkirkeani Annaassisitta Oqaluffiani aqagu juullersuarmi naalagiartitsisussaq aperaarput, aqagu suna pingaarnertut oqariartuutigissaneraa. Inuup namminissarsiorpallaarani susassareqatigiinnerunissamik ujartuinissaata pingaassusia, akivoq.
- Soorunami juullip iivangkiiliua aallaavigissavara - naalungiaq nersutit inaanni inunngortoq. Oqaluussissutigissavara tipaatsunnartoq taanna, savanik paarsunit tusarneqaqqaartoq, uatsinnut aamma tunniunneqaqqaarmat. Nuannaarneq tipaatsunnerlu kisitta piginagu aamma inoqatitsinnut kikkuugaluartunut aamma ingerlateqqissagatsigu, biskoppi oqarpoq.
Ilaqutariit ikinngutillu qaninnerit peqatigalugit juullisiortarneq nalinginnaasoq oqaatigaa, juullilli tipaatsunnartua tamanut sunniuteqaqqullugu kinarsuugaluartumut kinannguugaluartumullu tipaatsunnermik ingerlatitseqqinnissaq pingaartuusoraa.
- Kisiartaanngilanga susassaqaqatigiinnermik qimakkiartuaarinninnitsinnik maluginnittoq. Inuit imminnut pingaartinneranni ataatsimoorneq pingaartikkunnaarsimavaat. Taamaammat juullimi ataatsimoorsinnaaneq takutissavarput, ulluinnanngoqqippallu aamma ingerlateqqillugu, Sofie Petersen oqarpoq, nangillunilu.
- Nalunngilarpummi juulli misigissutsinik attuisartoq aamma nuannaarnermik aliasunnermillu. Taamaalillugu kinannguugaluartoq avitseqatigisinnaavarput, oqarpoq.
Ilagiillu kalaallit tamaasa uummammit pisumik juullimi pilluaqqujumavai, neriuutigalugu tamatta eqqissinartumik juullisiussasugut.
Biskoppip juullerujussuarmi Nuummi Annaassisitta Oqaluffiani naalagiartitsinera aqagu ullaakkut arfineq-pingasunut nunatta sinnerani Kalaallit Nunaata Radioagut tusarnaarneqarsinnaassaaq.
