Biskop: Eqqumiippoq paasiuminaallunilu
Kalaallit Nunaanni innuttaasut 95 procentii ilagiinnut kristiumiuussutsimut ilaapput taamaattumillu qinunermik tussiarnermillu ullup aallartinneqarnissaa pingaaruteqarpoq, biskopip Sofie Petersenip isornartorsiuteqarnini taama tunngavilersorpaa.
KNR inuiaat kalaallit radiorivaat, tamatigoortuusussaallunilu taamaattumik upperisamik aalajangersimasumik pingaarnersiussaanani, suliffeqarfik innutaasunut kiffartuussivik taama akissuteqarpoq.
- Eqqumiigisorujussuuvara tunngavilersuutigineqartoq, nunatsinnimi innutaasut 95 procentii sinnerlugit ilagiinnut ilaasortaapput, kristumiussutsimut atallutik, kisitsit 95 procent annertungaatsiarpoq taamaattumik nalilersuineq paasiumaatseqaaraa, biskop Sofie Petersen taama oqarpoq.
Biibilimik eqqarsaatissiissutit aallakaatinneqartarunnaarnerat pillugu ilagiit sinniissaannit, provstinit aamma ilagiinnit biskoppi saaffigineqartarpoq, tamannalu pillugu KNR-ip pisortaanut KNR-illu siulersuisuini siulittaasumut allakkanik nassitsisoqarpoq, aallakaatitap aallarteqqinneqarnissaa piumasarineqarluni.
Biskoppi Nuummi ilagiit sinniisaannit tapersersorneqarpoq.
Biskop Sofie Petersen Nuummi ilagiit sinniisaannit tapersersorneqarpoq soorluttaaq takkua KNR-imut kissaateqarlutik saaffiginnissimasut
- Oqaasimininnguit annikikkaluartut ataatarpoornertallit pilluaqqusinertallit taakkua ulloq aallarnerlugu tusassallugit nuannersutut nalilerusuppara, Nuummi ilagiit sinniisaani siulittaasoq Suso Heinrich taama oqarpoq.
KNR-ip radioani pisortap Masana Egede-p oqaluttuaraa, upperisarsiorneq aallakaatitassiatut allatulli nalinginaasutut aallakatitassiarineqartassasoq erseqqissaatigaluguli, - eqqaasisitsissutigissavara KNR pisussaanngilaq upperisaq ataaseq siuarsassallugut,
KNR-ip radioani pisortaq Masana Egede taama oqarpoq.
Biibilimit eqqarsaatissiissutit aallakaatinneqartarnerat septemberip ulluisa tallimaanni unitsinneqarpoq.