Birna annertuumik aqqunarsimalluni ilisimajunnaaqqallunilu imaanut iginneqarpoq
Islandimiup arnap Birna Brjánsdóttirip toqutaanera pillugu eqqartuussineq Reykjavikkip Eqqartuussiviani ingerlanneqartoq aallartereerpoq. Angut kalaaleq toqutsimasutut pasineqarluni suliami unnerluutigineqarpoq.
Ilisimannittutut nassuiaatinneqartussat ullumi arfiniliupput, siulliullunilu nassuiaatinneqartoq tassaavoq nakorsaq toqusunik misissuisartoq Dr. Mario Brok, islandimiup arnap puaanik misissuisimasoq.
Taanna eqqartuussivimmi nassuiaavoq Birna Brjánsdóttir imaanut iginneqarnermi kinguninngua toqusimasoq. Annertuumik aqqunarsimanera ilisimajunnaaqqaneralu tamatumunnga pissutaapput.
AAMMA ATUARUK Unnerluutigineqartup nassuiaatini eqqartuussivimmi allanngortikkaa
Nakorsap inerniliinera naapertorlugu ipilluni toqusimavoq, tamannalu sukkasuumik pisimasinnaalluni.
Angut kalaaleq unnerluutigineqartoq eqqartuussivimmi ullumikkut najuutinngilaq. Taanna aggustip 21-iani nassuiaatinneqarpoq, Birna Brjánsdóttirillu toqutaaneranut pinngitsuunerarpoq.