Binzerip Naalakkersuisut nersualaarpai

Air Greenlandimi pisortaanerup, Michael Binzerip, suliffeqarfiit atuagassiaannit, Travel People-imit, apersorneqarluni, erseqqissaatigaa, politikkikkut Kalaallit Nunaanni 2009-mi nikittoqarmat, Naalakkersuisut Air Greenlandilu, siusinnerusumut naleqqiullugu, oqaloqatigiilluarnerulersimasut.
Allattoq Carla Davidsen
novembarip 25-at 2011 07:40

- Suna tamaat soorunalimi isumaqatigiissutigisinnaanngilarput, assigiinngitsunilli paasinnissinnaasugut Naalakkersuisut nutaat takutippaat, taannaanarluunnimmi nuannerpoq, Michael Binzer atuagassiamut Travel People-mut oqarpoq.

Michael Binzerip atuagassiamit apersorneqarnermini aamma eqqaavaa, suliffeqarfissuup aningaasartuutai ima isumaqarsimasut - issuaaneq aallartippoq: "Air Greenland kisermaassilluni illersugaalluni ingerlatsiunnaareerpoq, maanna tassaavoq timmisartuutileqatigiiffik unammillersinnaasoq" - issuaaneq naavoq.

Michael Binzerip aamma tikkuarpaa, ilaasunik angallassineq kisimi pineqanngimmat, avataanili sulinernut pingaarutilinnut aamma sunniuteqartoq, tamannalu "ineriartornertut annertoorujussuartut" nalilerpaa.

Air Iceland kisimi malunnaatilimmik Air Greenlandimut ullumikkut unammillertuuvoq. Atuagassiamit Travel People-imit ilisimatitsissutit naapertorlugit, Kalaallit Nunaannut Kalaallit Nunaanniillu timmisartuussinerit 14-15 procentii islandimiut timmisartuutileqatigiiffiata tigummisarigai.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq