Binzer allagarsiussartaqanngitsumik atorfinitsinneqarpoq

TV-kkut aallakaatitassiami ”Kalaallit Nunaannit qimaaneq”-mi Michael Binzerip sakkortuuliorluni Namminersornerullutik Oqartussat isornartorsiorpai pisortanik atorfinitsitseriaasiannik siulersuisunullu ilaasortanik toqqaariaasiannik. Taanna isumaqarpoq qanigisanik atorfinitsitsisoqartartoq. Namminerli taamatorpiaq atorfinitsinneqarsimavoq, Air Greenlandimi pisortatut ukioq manna juunip ulluisa aallaqqaataanni atorfinitsinneqarami.

Tutsuviginartut oqaatigaat taamanikkut siulersuisunut siulittaasoq Københavniliarsimasoq atorfik Michael Binzerimut neqeroorutigiartorlugu. Uteramilu Air Greenlandimi siulersuisut nalunaarfigai Michael Binzer pisortanngussasoq. Atorfik inuttassarsiuunneqanngilaq aammalu ingerlatsivimmik atorfinnut piukkunnaatilinnik ujaasisarfimmik atuisoqarsimanngilaq.

Michael Binzerip uppernarsarpaa atorfik namminerminut neqeroorutigineqarsimasoq, inuttassarsiuunneqanngitsumik aammalu atorfinnut piukkunnaatilinnik ujaasisaqarfimmik atuisoqarani.

–Siulersuisut isumaqatigiissut inassutigisimavaat periuseq taanna atorneqassasoq, taanna oqarpoq.