Billitsit pappialat Air Greenlandimi atorunnaassapput

Inniminneeriaaseq Air Greenlandip allanngortinnialerpaa, tamannalu angalaniartunut inniminniisartunut sunniuteqassaaq.

Angalasussanut allannguut annerpaaq tassaassaaq billitsit pappialat Air Greenlandip ingerlaarfiini oktobarip ulluisa aallaqqaataanniit atorunnaassammata. Pisattanik tunniussinermi passit kinaassutsimulluunniit uppernarsaatit assitallit allat takutikkaanni siunissami naammassaaq.

- Nunami Kalaallit Nunaattut isorartutigisumi pappialanik billitseqartitsineq pisariusinnaasarpoq, Tuniniaanermut Nittarsaassinermullu pisortaq, Christian Keldsen tusagassiutinut allappoq, nangillunilu:

- Misigisaqaarput billitsit inuttassaminnut ullormi aallarfissaanni apuutinngitsoortut. Ajornartorsiut tamanna inniminneeriaatsimi nutaami peerutissaaq,

Christian Keldsen allappoq.

Billitsit pisiassat atuutereersut allannguuteqanngillat, tassa Takuss’billitsit, billitsit aappaluttut qorsuillu suli pisiassaapput, billitsimilluunniit pappialamik pinngikkaluaraanni, Air Greenland tusagassiutinut nalunaarummi allappoq.