Billitseqarani angalaniarneq siulleq ilungersunartorsiorfiuvoq

Inniminniinermut atortup nutaap, Navitaire-p, isumagissavaa timmisartuutileqatigiiffiup kiffartuutaasa billitsitaqanngitsumik siunissami angalasinnaanissaat.

Tamatuma ullumi atuutilernera assigiinngitsunik ajornartorsiutitaqarpoq, Københavnimiit Kangerlussuarmiillu aallarnissat kinguartoornerannik tamanna kinguneqarluni.

Air Greenlandimi kiffartuussinermut pisortaaneq, Morten Nielsen, oqarpoq, ilaasussat inniminniinerminni normuminnik eqqaamannissinnaanngitsut ilaatigut ajornartorsiutaasimasut, ilaasussallu normuminnik eqqaamannittut Kangerlussuarmiit aallariartoraluaraangamik ilaasussat allattorsimaffianni allassimasarsimanngitsut.

Ilaasussarpassuit, pingaartumik Kangerlussuarmiit ingerlaqqinniartut, assut naammagittaassimapput. Aallartussalli tamarmik ingerlaqqipput, naak kinguaattooraluarlutik, taamalu pisoqarsimanera Air Greenlandip ilaasunut ajuusaarutigaa.

Air Greenlandimilu kiffartuussinermut pisortaq, Morten Nielsen, aamma oqarpoq, ulluni tulliuttuni kinguaattoortoqartarsinnaanera ilaasussanut sillimaffigeqqullugu, ilaasussallu kajumissaarpaat aallariartornerminni inniminniinermut normup nassarnissaa aamma Kangerlussuarmiit Narsarsuarmiillu ingerlaqqinnissamut GL-normu eqqaamaqqullugit.