Bill Clinton Haitiliarpoq
Bill Clinton Naalagaaffiit Peqatigiit immikkut aallartitaattut ullumikkut Haitimiissasoq, Ritzauimi allaaserineqarpoq.
- Naalagaaffiit Peqatigiit immikkut ittumik Haitimut aallartitaattut, misigisimavunga Haitimiut tikeraarnissaannut, præsidentillu Prévalip naapinnissaanut pisussaaffeqarlunga, taamaalilluni ikiuiniarnerput ataqatigiissaakkamik pilertortumillu ingerlanneqarsinnaaniassammat, Clinton oqarpoq.
Siornatigut præsidentiusimasup taassuma ilaatigut nassassavai, "ikiueqqaarnermi atortussat, taakkununnga ilaallutik imeq, nerisassat, nakorsaatit, qaammartartut seqernup nukinganik ikummatillit, radiut angallattakkat aamma innaallagissiuuteeqqat".
Bill Clintonip ilaatigut ataatsimeeqatigissavai Haitimi naalakkersuisut aamma nunani tamalaani oqartussat, ikiuiniarnerup qanoq periuseqarluni ingerlanneqarnissaa oqaluuserineqarniassammat.
USA-mi maanna præsidentiusoq Barack Obama, nunamut tassunga, nunap sajunneranit eqqugaasumut, sakkutuunik 5.000-inik ikiuiartortitsiniarpoq. Haitimi aqqusinerni pinerlunniarfiuleraluttuinnartuni, eqqissisimasoqarnissaa torersumillu ingerlatsisoqarnissaa sakkutuut isumagisussaavaat. Amerikamiut umiarsuaat napparsimmavittut atorneqartoq sapaatip akunnerani matumani aamma Haitiliartinneqassaaq.
