Biilit innaallagissamoortut suli tunisaavallaalinngillat

Biilit qanganitsat benzinatortuullutilluunniit diesilitortut ukiuni amerlasuuni siullerni biilinut eqqaaviliaattariaqanngilaat, aviisimi Jyllands-Postenimi ullumi saqqummersumi taama allaaserinnipput.

Biilinilli nioqqutissiorfiit annersaasa naatsorsuutigaat, biilit innaallagissamoortut nutaat ikittuinnaat pisiarineqassasut.

Nukissiuuteqarnermut aqutsisoqarfimmi fuldmægtigip, Lisa Bjergbakke-p, ilimagaa, biilit innaallagissamoortut 80.000-it missaanniittut 2020-mi atorneqalersimassasut:

- Biilit maannakkut atortut allanut tunniussussagutsigik aatsaat biilit innaallagissamoortut 200.000-it 500.000-illu akornanni amerlassusillit pigineqalissapput, Lisa Bjergbakken oqarpoq.

Biilit innaallagissamoortut, brintimilluunniit atuisut, Danmarkimi EU-miluunniit tunisaarujussuarnissaat EU-mi Avatangiisinut Sullissivimmi, EEA-mi, nukissiuuteqarnermut angallannermullu pisortap, Peder Jensenip, aamma ilimaginngilaa.

- Angallannermi silaannaap artorsartinneqartarnera biilit literimut ungasinnerusumukartalerpata aatsaat pitsanngortinneqarsinnaassasoq ilimagaarput, Peder Jensen oqarpoq.

Biilit innaallagissamoortut batteriinik ajornartorsiuteqartarnerat, ungasissumullu ingerlasinnaarpiannginneri ajornartorsiutaanerpaatut, Angallanneq pillugu ilisimatuup, Aalborgimi Universitetimeersup, Harry Lahrmannip, tikkuarpaa.

- Biilit siorngatungaanni igalaap sermiiarneranut innaallagiaq atorsimallugu nunaannarmi aqquserngup qeqqani ukiorissuugaa unittoorneq sumut iluaqutaassagami, Harry Lahrmanna oqarpoq.

Biilit innaallagissamoortut Danmarkimi ullumikkut 324-upput.