Biilit arlallit Nuummi aportut

Tallimanngormat Nuuk perlulluni anorlersukasiuvoq. Sila ajorseruttortoq biilit arlallit aqqusinermi 400-rtalimmi aporput.

Biili ataaseq unikkallarsimavoq aqqutissani ersigunnaarmat. Taamaasimmat biilimit allamit tunuaniit aporneqarsimavoq sulilu marluk allat tunuanniit aportunut ilanngussimallutik.

- Biilinik siullernik ingerlatsisoq biilit marluk akornanni nissimigut kiggigussaasimavoq biilia tunuaniit aporneqarmat. Angut nissumigut ajoquserpoq kingorna Dronning Ingridip napparsimmavissuani suliarineqartariaqarsimalluni, taama nalunaarpoq politikommisær Pavia Kleist Nuup politiiviniit.

Politiit isumaqarput biilit arlallit apornerat pinngitsoorneqarsimasinnaagaluartoq isikkivilunneranut biilit sukkassusertik naleqqussarsimasuuppassuk.

Unataasoqarsimaneranut atatillugu Nuummi politiit aamma takunnissimasinnaasunit attavigineqarusupput. Nukappiaq 13-inik ukiulik taamaaqatiminit arlalinnit unatarneqarsimavoq arfininngornermi tilluarneqarlu isimmissarneqarlunilu sullorsuup eqqaani. Nukappiaq napparsimmaviliaanneqartariaqarsimavoq nakorsamillu misissortilluni.

Unataasulli qanoq isikkoqarnera pillugu paasissutissat ikittuinnaapput. Taamaammat unataasoqarneranut atatillugu takunnissimasoqaruni imaluunniit paasissutissaateqartoqaruni Nuup politiivinut saaffiginneqquneqarput oqarasuaat 321448 atorlugu.

Unataasut ilaat qorsummik/qaqortumik jakkeqarnerarneqarpoq DC-mik meqqilimmik.