Biilinut innaallagiatortunut Nuuk tulluavippoq
Ukiut marluk kingulliit ISS biilimik innaallagiatortumik Nuummi atuivoq. Apisarnera issittarneralu biilimut akornutaanngivipput. Maanna CSR Greenlandip ISS suleqatigalugu biilit innaallagiartortut nunatsinni atugaanerulernissaat sulissutiginialerpaa.
- Biilit innaallagiatortut ISS-mi atorusuppavut. Tassami avatangiisinut iluaqutaaginnaratik siunissaq ungasinnerusoq isigalugu akikinnerupput. Assakaasut sisamat ataatsikkut atorlugit ingerlasartunut sanilliukkaanni ajornerunngillat. Taamaammat biilit innaallagiartortut Kalaallit Nunaanni atugaanerulernissaat kissaatigaarput. Biiliutillit orsussaq atorunnaarlugu innaallagissamut ikkuffik atulissagaat paasititsiniutigissavarput, ISS Grønlandimi biilinut akisussaasoq Tom Amtoft KNR.gl-mut oqarpoq.
Novembarip qaammataani Nuummi malunnartitsiniaanikkut biilit innaallagiatortut takoqqusaarutigineqassapput. Tassunga atatillugu biili Nissan Leaf ISSip tikisissimavaa suliffeqarfiillu misiliinissamut periarfissaqartinneqassapput. Taamaasillutik biili qanoq pitsaatigisoq nammineq malugisinnaassavaat.
- Danmarkimi biilinik tuniniaasartut arlallit attavigaavut ajoraluartumilli siumut isummereertarneq pissutaalluni Kalaallit Nunaat pilerigivallaanngillaat. Nissanili allamik isumaqarpoq taakkulu suleqatigalugi Nissan Leaf qaammatini pingasuni misiliutitut atortussanngorparput. Pitsaaqaaq akitsuutitigullu akisunani kiisalu iluarsaanneqartariaqartarnerit akuttullutik. Neriuppugullu pisoqartitsinermi biilinut innaallagissamoortunut inuit pileritsatsissinnaallugit, Tom Amtoft oqarpoq.