Biilini tillinniarnerit arlallit

Nunatsinni illoqarfiit pingaarnersaanni Politiit sapaatip-akunnerani qaangiuttumi ulapissimaqaat. Ataasinngormat kingullermimiit ullumikkumut 175-it missaannit saaffigineqarsimapput, oqarasuaatikkut, nammineq saaffiginninnikkut politiilluunniit namminneq ornigunnerisigut tamanna pisarsimalluni.
Allattoq Carla Davidsen
februaarip 27-at 2012 06:12

Pisunit assigiinngitsunit inatsisinik unioqqutitsinerit 54-it politiit suliarisimavaat - pisiniarfinni tillinniarnerniit perulluliornernut. Inuit 13-it politiinit tigusarineqarsimapput, taakku imigassartorpallaarsimallutik qaatussertariaqarsimapput, ininiluunniit festerfimminni perulluliornissaat pinngitsoortinniarlugu tigusarineqartariaqartarsimallutik.

Biilini tillinniarnerit arlallit politiinut aamma nalunaarutigineqarsimapput.

- Tillinniarnerit taaneqartartut: "akuerineqarani atornerit" - soorlu pialuutinik biiliniittunik - amerlasoorpassuit misigaavut. Qaammatip kingulliup ingerlanerani tamakku ingasatsissimapput. Nukappiaaluit tamakkununnga pikkoritsissimaqaat, Nuummi Politeeqarfimmi pigaartoq, Henning Siezing, KNR-imut ullaaq oqarpoq.

Inuit nalilinnik biilinut qimatsinissartik eqqarsaatigilluartariaqarpaat, Politiit kaammattuipput. Biili qimaleraanni parnaarlugulu, pialuutit nalillit tigunissaat eqqaamasariaqarpoq.

Pasinarsinnaasumik tuniniaasumik naammattoorsigaaani tamanna Nuup politiivinut nalunaarutigeqquneqarpoq oqarasuaat 321448 atorlugu imaluunniit nammineerluni politeeqarfimmut ornigunnikkut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq