VIDEO Biili sukkaniuut innaallagiartortoq Nunatsinni angalaartoq
Biilimik sukkaniuummik innaallagiartortumik Issittumi sikutami siullerpaamik ingerlasoqarpoq. Biilit sukkaniuutit Formel-E-nik taaneqartartut Formel 1-imi atorneqartartunut assingusupilussuupput, assigiinngissutaalli tassaavoq innaallagiartortuunerat taamaattumillu CO2-mik aniatitsisuunnginnerat.
Suliniaqatigiiffiit tusagassiorfinnut nalunaaruteqarluni allappoq nunarsuup silaannaata aatsaat taama kiatsiginerata sammineqarnerunissaa kissaatigalugu, taamatummi pisoqarneratigut issittoq sikuerukkaluttualermat.
Taamaammat biili sukkaniuut Tunumi Isertumukaappaat, biililu sulisullu tassanngaanniit qulimiguulimmik sikutarujussuarmukaanneqarput. Formel E-mi sukkaniuuttartut pikkorinnersaat, Lucas di Grassi, Issittumi sikutarsuarmi siullerpaalluni biilimik sukkaniuummik innaallagiartortumik ingerlaqqaartuuvoq.
- Tikitaq alianaaqaaq eqqissisimanaqalunilu. Sikutarujussuarmut niunerma takusaqarnermalu, aammalu nunarsuup silaannaata kiannerulerneranit allanngoriartortoqarnerata, Formel E-mik ingerlatsinitsinnik aammalu biilinik innaallagiartortunut atuinitta qanoq pingaaruteqassusianik eqqaaseqqippaanga, Lucas di Grassi taama oqarpoq.
Taamatut suliniuteqartoqarnera arlalinnik filmeeraliarineqarpoq, taakkulu takutinnerisigut Issittumi silap pissusiata sukkasuupilussuarmik allanngoriartorneranik, ilaatigut imaviit qaffakkaluinnarnerinik kinguneqartoq, sammineqarnerulersinnaassasoq aningaasaliisut FIA-llu neriuutigaat.
Issittumi biilimik sukkaniuummik suliniutaasoq suliffeqarfinnit ilisarisimaneqarluartunit innunnillu ataasiakkaanit tapersersorneqarpoq. Ilaatigut DHL-imit, VISA-mit aamma Monacomi kunngip ernerata Albertip Aappaata aningaasaateqarfianit. Nunatsinni naalakkersuisut suliniaqatigiiffimmit FIA-mit aamma nersualaarneqarput. Nunatsinni oqartussat ikiuilluarsimanngitsuuppata suliniut iluatsissinnaasimanavianngikkaluartoq, FIA allappoq.
Silap pissusia pillugu ataatsimeersuarnermut COP22-mut, Marokkomi novembarimi ingerlanneqartussamut atatillugu, FIA-p 'Project Ice' pillugu filmiliani piviusulersaarut minutsinik 48-nik sivisutigisoq takutinniarpaa. FIA-p Formel E-lu, tupaallannanngitsumik, isumaqarput biilinik innaallagiatortunik atuisoqarnerulernera silap pissusiata allanngoriartorneranut aaqqiissutaasinnaasoq.
