Biili, orsussamik tankimi matoqqasumiitinneqartumik usisoq, Ilulissat avannaatungaani erngup nukinganik nukissiorfiliorfimmi Paakitsup ilorliani, sikukkut assartuitilluni imaanut maajip qaammataani nakkarpoq.
Istak-ip, tassa Ilulissat avannaatungaani erngup nukinga atorlugu nukissiorfiliortup, biili immap naqqani 40 meterisut ititigisumiittoq immap iluani assiliissut atorlugu sumiissusersivaa.
- Biili qaqitseriarnermi siullermi qaqinneqarpoq Paakitsuliaanneqarlunilu, Ole Kristensen Paakitsumi erngup nukinganik nukissiorfiliornermi nakkutilliisoq oqaluttuarpoq.
Taamaattorli paasinarsivoq tanki uuliamut poorineqartoq seerisimasoq:
- Uulia immap qulaanut seerisimavoq, tassanngaanniillu malugineqarani aalannguussimalluni, Ole Kristensen Nukissiorfinneersoq oqarpoq.
Uuliap seerinera ilutigalugu tanki imermik immersimavoq. Ajutoornermi inunnik ajoqusertoqanngilaq.