Biilertut ikiaroornartulerisullu politiinut suliakkersuutaasimaqaat
Kalaallit Nunaanni politiit ukiumoortumik kisitsisit atorlugit nassuiaaneri 2009-mut tunngasut maanna kikkukkunit tamananit atuarneqarsinnaalerput.
Kalaallit Nunaat ataatsimut tamaat isigalugu, 2009-mi 5.251-erluni pinerlunnerit politiinut nalunaarutigineqarsimapput. Taakku saniatigut immikkut ittumik inatsimmik unioqqutitsinerit, taakkununnga ilaallutik aqqusinikkut angallannermi unioqqutitsinerit aamma ikiaroornartoq pillugu unioqqutitsinerit 1.588-it nalunaarutigineqarsimapput.
Aqqusinermi angallannikkut unioqqutitsinerit amerlisimaneri malunnarnerpaavoq. Tamatumunngali pissutaasinnaavoq aqqusinikkut angallannerit Kalaallit Nunaanni politiit eqqummaariffiginerulersimammatigit, Bjørn Bay isumaqarpoq.
Ikiaroornartumik hash-imik arsaarinninnerit aamma amerleriarsimapput: 2008-mi hash 43 kiilu arsaarinnissutaasoq 2009-mi 183 kiilu arsaarinnissutaasimavoq. 2009-mi taama amerleriataarnerannut pissutaaneruvoq ukioq taanna tissiartaat atorlugu eqqusseriaraluarnermi 118 kiilu arsaarinnissutigineqarmat.
Unataanernik aamma toqutsinernik nalunaarutit ukiunut siuliinut naleqqiullugit taamaaginnagajapput. Naalagaaffeqatigiinnerulli iluani nunanut allanut naleqqiullugit suli amerlavallaarujussuartut, politimesterip tikkuarpaa.