Biilertunut inatsisit qulit Vatikanip suliarai
Vatikanip biilertut qanoq iliussanersut qanorlu iliussannginnersut pillugit inatsisit qulit suliarisimavai:
Ukiut tamaasa nunarsuarmi inuit 1,2 millionit aqqusinikkut angallannermi toqutaasarput 50 millionillu missaanni ajoqusertarlutik. Kisitsisit taakkua katuullit Vatikanimi aqutsisoqarfiata uissuummissutigeqai qanorlu iliuuseqarfiginialerlugit, taamaattumillu aqqusinikkut angallannermi biilertut qanoq iliussanersut qanorlu iliussannginnersut pillugit inatsisit qulit suliaralugit. Ilagiit inassutigaat inuit biililersinnatik imminnut sanningasuusamik ussersorfigisassasut aammalu biilimi aqulissagunik biileqatitik inussaminnik ussersorfiginaveersaartassagaat oqaasipilugatillu kamassaqajaasassanngitsut guutimillu mitaatiginnittutut pissusilersoratik. Tuluit tusagassiorfissuat BBC naapertorlugu Vatikanip aatsaavissuaq siullermeerluni aqqusinikkut angallannermi kamattarnermik ajornartorsiut annertooq iliuuseqarfiginialerpaa. Inatsisit qulit imaasa ilagaat imigassartorsimalluni biilertoqassanngitsoq ajunaartoqartillugulu biilimik qimaasoqartassanngitsoq, unittoqartassasorli ikiuiniarluni. Ilagiit katuuliusut aqqusinikkut angallannermi ileqqussat pillugit allakkani 36-nik qupperneqartuni aammattaaq allassimavaat biili ajortuliornermut aqqutaasinnaasoq. Ajortuliorneq ilaatigut tassaatinneqarpoq ulorianartumik qaangiilluni saneqqussinerit aammalu arnat atortittartut biilinut ikineqartarnerat. Aqqusinikkut angallannermi ileqqorissaarnissamut inatsisit qulit siunnersuutillu allat Vatikanip maannamut allattugai Ruumap qeqqani naalagaaffimmi Vatikanimi angallannermi ajornartorsiutinit aallaaveqarsimagunanngillat. Naalagaaffeerannguami tassani ukiorpassuit matuma siornatigulli angallannermi sukkassusissaq 30 kilometeriusoq aalajangersarneqareersimavoq, taannalu sumiluunniit atuulluni.
