Bidenip naalakkersuinermi akisussaasutut eqqartuunneqarsinnaanissaanik misissuisoqarsinnaalertoq

USA-p præsidentiata Joe Bidenip naalakkersuinermi akisussaasutut eqqartuunneqarsinnaanissaanik misissuinermik atortussanngortitsinissaq, USA-mi inatsisartut aappaanni Innuttaasut sinnerlugit sinniisoqarfimmi, tassa Repræsentanternes Husimi amerlanerussuteqartut taasissutigaat.

Tassa imaappoq, Joe Bidenip naalakkersuinermi akisussaasutut eqqartuunneqarsinnaanissaanik pisortatigoortumik misissuisoqarsinnaalissaaq.

Taama pilersaartoqarnera politikkikkut takoqqusaarutaannaasoq Bidenip præsidentip illorsuanit nalunaarummi ilaatigut oqaatigaa, republikanerillu sallu sakkuliullugu saassussinerarlugit.

Repræsentanternes Husimi taasisoqarmat 221-t siunnersuummut akuersipput, 212-illu itigartitsillutik. Republikanerit Repræsentanternes Husimi amerlanerussuteqarput.

Biden ernimi Hunter Bidenip nunani allani niuernerani naapertuilluanngitsuliornikkut iluaqutissarsisimanersoq misissorniarneqarpoq.

Præsidentilli inatsisinik unioqqutitsisimaneranik takussutissanik saqqummiussaqartoqarsimanngilaq.

Misissuiniarneq præsidentip illorsuanit akuersaarneqanngilaq, inatsisaatsuliortoqarsimaneranik takussutissaqannginnerarlugu, politikkikkullu malersuiniarnerunerarlugu.

Bidenip naalakkersuinermi akisussaasumut eqqartuussinikkut uppitinneqarsinnaanissaa ilimanarpallaanngilaq.

Repræsentanternes Husimi ilaasortat amerlanerussuteqartut misissuisoqarnissaa tapersersussagaluarpassuk, Bidenip eqqartuussaanissa Senatimi ilaasortat ikinnerpaamik 67-it akuersissutigeqqaartussaavaat.

Tamannalu pisinnaagunanngilaq, demokratimmi senatimi amerlanerussuteqaqqalaarmata.