Bhuttop toqqutigisaa isumaqatigiinngissutaavoq

Naalakkersuisut oqaatigaat, qinnguartaalluni assilisat ersersikkaat, Bhuttop aallaaneqarnini qaartitsisoqarneratigulluunniit saviminermit eqqorneqarnini toqqutiginngikkai.

Pisortatigoortumik nassuiaatigineqartoq tassaavoq, Bhutto niaqqumi saarngata ajoquserneqarneratigut toqusoq, soorlu naalagaaffimmi pissutsinut ministeeriaqarfiup oqaaseqartitaata taama nassuiaraa.

Tassa ilimatsaanneqarmat Bhutto qanittunnguami imminuujutigaluni qaartitsisoqarneratigut biilip issimaffigisami qilaavata illikartittakkap tigummivianut aporujussuarnini toqqutigigaa.

Taama nassuiaateqarneq partiiata asuli oqalunnerunerarpaa salluliuutaanerarlugulu.

Taamatut nassuiaaniarsarineq ministeeriap nassuiaataasa pingajoraat. Siullermik qungatsimigut aallaaneqarnini toqqutigigaa oqaatigineqarpoq, tamannali allanngortinneqaraluarpoq imminuujutigaluni qaartitsisoqarneratigut saviminermit eqqugaanini toqqutigisimassagaa oqaatigineqarluni.

Bhuttop allattaa, ilisineq sioqqullugu timaanik asattueqataasoq oqarpoq, Bhutto niaqqumigut kiinnamigullu aallaatinnerminit ikeqartoq.

Bhuttop eqqartuussissuserisuata ilanngullugu oqaatigaa Bhutto aamma ilumigut aallaaneqarsimasoq.

Naalakkersuisut aamma Bhuttop partiiata kina toqutsisuunersoq aamma isumaqatigiinngissutigaat.

Naalakkersuisut isumaqarput toqutsinermut al-Qaedakkut pisuusut, partiiatali taamatut nassuiaateqarnermut uppernarsaatissat amigaatigai.

Partii isumaqarpoq naalakkersuisut Bhuttop toqqutigisimasaanik nassuiaataat aamma toqutsisuusimasinnaasunik nassuiaatit, isumannaatsuunissap qanoq amigaateqartigisumik ingerlanneqarneranik takussutissaaginnartoq, tassami siusinnerusukkut Bhutto arlaleriarluni toqoriarneqartareermat.

Aamma sooq toqusup timaa ammarlugu misissuiffigineqannginnersoq kiisalu toqutsiffiusoq sooq taama nukingertigisumik eqqiarneqarnersoq akissutisineqarusukkaluarput.