Bhutan kunngeqarfiujunnaarpoq
Tassalu illoqarfik pineqartoq tassaavoq Bhutan, taanna Himalayap qaqqartoqisup nalaani inissisimasuuvoq. Inuit taasitinneqarsimapput taamaalillunilu ukiuni 100-ni kunngeqarfiusimasoq inuinnarnit naalakkersuisooqataaffigineqarsinnaalerluni.
Inuinnaat naalakkersuisooqataalernissaannik isuma innuttaasunit aallaaveqanngilaq kunngikkormiulli namminneerlutik tamanna innuttaminnut siunnersuutigisimavaat. Taavani kunngiusoq Jigme Singye Wangchuck 2006-mi kunngiunerminit tunuarpoq pissaaninilu ernerminut tunniullugu. Taamanili erneriit marluullutik innuttaminnut kimigiisissutigaat inuinnaat naalakkersuisooqataanerat nunaminnut eqquteqqillugu.
Kunngiusimasoq nunamini illoqarfinnut angalalluni innuttaminut kimigiisertuarsimavoq inuinnartut naalakkersuisooqataaleqqullugit, suliarli oqitsuinnaasimanngilaq tassami innuttaasut kunngeqaannarusullutik kissaateqarsimagaluarmata. Kunngertik iluarisimaqaat inuinnartullu naalakkersuisooqataanissartik nakerisimanagu.
- Kunngeqarallaratta ajoquteqanngiivikkaluarpoq, tamatta pilluarpugut nunarpullu siumukarluni, taama Bhutanimi innuttaasut ilaat nutaarsiassaqartitsivimmut CNN-imut oqarpoq.
Kunngilli erneriit piumasartik pivaat, Bhutanimiut taasisinnaasut 79 procentii taasiartorsimapput, taamaalilluni kunngeqarneq tunuartinneqartussanngorluni.
