Parisimi peqqarniisaarniartoqarmat politeeq toqunneqarpoq
Politiilli ataatsip Parisip aqqusernisa ilisimaneqarnerpaat ilaanni Champs-Élysées-mi aallaaneqarluni toqutaanera, suleqataasalu allat marluk ikilerneqarsimanerat tusarliunneqarmat, qineqqusaarneq tunulliunneqalerpoq.
Peqqarniisaarniat Islamisk Statimeersut saassussinermut akisussaasuunertik nalunaarutigaat, saassussisummi sorsuttartoqatigiivinut ilaasoq oqaatigigaat.
Aallaat saassussisup eqqarasuartaat Parisimi unnukkut qulingiluanngulersoq atorsimavaa, politiit biiliisa tungaannut eqqarsimalluni politeerlu tassani toqussimallugu.
Aqqusinersuaq Champ-Élysées takornarnianik ulikkaartuaannangajappoq, eqqartoqalermallu uippallertoqalersimalluni.
Saassussisoq arpalluni qimaasimagaluarpoq politiiniilli aallaaneqarluni toqutaavoq.
Angut pineqartoq siornatigut ilisimaneqartoq oqaatigineqarpoq. Politiinimmi saassussiniartutut pasineqarluni ukioq manna februaarimi tigusarineqaraluarpoq kingornali iperagaatinneqaqqilluni.
