Puisit amiinik Great Greenlandimut pisiniarneq pisariuvoq akisullunilu

- Nioqqutissiornerput unitsiinnarsinnaanngilarput Great Greenlandimit  ammit tunisassiat utaqqillugit.  

Taama oqaluttuarpoq Anita Høegh umimmaat qiviunik tunisassiorfimmik Qiviut-mik ingerlataqartoq niuertarfik taanna puisit amiinik mersukkanik tuniniagaqarpoq

Niuertarfik 2008-mili aallartikkamiuk puisit amiinik Great Greenlandimit  pisiniartarnera ajornakusoortarsimavoq ammillu akitsoraluttuinnarsimallutik.

- Ammit pissarsiariniartakkavut qaammatit arlaqartut utaqqisariaqartarpagut,taava naatsorsuutigisinnaavarput  paasitinneqassagut mananakkut toqqorsivimmiittuuteqannginnamik  peqalerunillu nassitsiumaartut  susoqaqqinnissaalu utaqqisarlutigu, Anita Høegh oqarpoq.

Danmarkimut pisiniartarput

Taama pisoqartarnera Anita Høghip kinguneqartippaa, puisit amiinik Danmarkimi pisisalerami.  Taannalu kisimiinngilaq.

Niuertarfiit puisit amiinik tuniniaasartut  Unik aamma Tupilak  radioaviisimut oqaluttuarput  puisit amiinik Danmarkimi pisiniartarlutik  taakkua akikinnerummata aamma pisariunnginnerummata, Great Greenlandiminngarnit.

Anita Høeghip paasisinnaanngilaa Danmarkimut pisiniarneq sooq  imminut akilersinnaanerummat.

- Puisit amiinik  Glostrupimi akitsorterussinermi arlaleriarluta pisiniartarpugut akikinnerummata  aamma  Kalaallit Nunaannut nassiunneqarneri akikinnerummata, tamannalu eqqarsarnarpoq pitsaasuunanilu, Anita Høegh oqarpoq.

 Pissutsit assigiinngitsut patsisigalugit  puisit amiinik Danmarkimi pisisarneq akikinnerusartoq   Great Greenlandimit nalunaarutigineqarpoq.

Kalaallit Nunaanni pisisartunik attaveqarnerulernissaq

Lars Berg Great Greenlandimit oqaluttuarpoq, Kalaallit Nunaanni mersortarfiit niuertarfiillu kissaataat akuersaarniarlugit iliuuseqarluartarlutik taamaattumik puisit amii ikinnerusut danmarkimut nassiunneqartalersimasut.

Lars Bergip erseqqissaatigaa,  Kalaallit Nunaanni pisisartuminnik attaveqartarnertik siunissami annertusineqarumaartoq aamma Great Greenlandimi  tuniniaaneq annertusineqassasoq kissaatigineqartut sukkanerusumik  naammassineqarniassammata. 

Taama neriorsuisoqarnera Anita Høeghip maannakkut upperisinnaangikkallarpaa iliuuseqartoqartinnagu.

- Nuannissagaluarpoq taama iliortoqarpat, oqarneq ataasiuvoq iliuuseqarneq allaalluni, Anita Høegh