Per Berthelsenip kamalluni qimagutikulanera Anda Uldumimit isorineqarpoq
Demokraatit Aningaasaqarnermut ataatsimiititaliami ilaasortaatitaat Anda Uldum maanna akissuteqarpoq. Sakkkortuumik nikassaalluni oqalunnerit Anda Uldumip Demokraatit sinnerlugit sakkortuumik akerlilerpai, taamatut oqalunnerit Inatsisartut inuiaqatigiinni ataqqineqarnerannut allisaataanavianngitsut ilaatigut oqaatigalugu:
- Per Berthelsen uangalu minnerpaamik ataatsimik assigiissuteqarpugut; nipilersoqatigiinni nipilersortartuuvugut. Nipilersoqatigiinni DDR-imi nammineq ilaasortaanini Per Berthelsenillu Sume-kkunni ilaasortaanera eqqaallugu Anda Uldum oqarpoq.
- Taamaattumik tamatta marluulluta nalunngilarput, nipilersoqataasut arlaata nipipalaat eqqortoorpagit, taava nipilersugaq tamarmi ajortumik eqqorneqassaaq. Anda Uldumillu politikkimut tamanna sanilliunneqarsinnaanerarpaa:
- Politikerit arlaat siutinngunartumik oqalulerpat taava politikerinut tamanut isuma ajortunngussaaq, Anda Uldum allappoq.
Per Berthelsenip kamalluni Aningaasaqarnermut Ataatsimiititaliami ataatsimiinnernit qimagutikulanera Anda Uldumimit aamma isorineqarpoq.
Anda Uldumip aamma paaserusuppaa, Siumup ataatsimiititaliami ilaasortaatitai marluk Per Berthelsen aamma Finn Karlsen qanorpiaq isumaqarnersut.
Tassami Anda Uldumip isumaa naapertorlugu, taakkua allakkatigulluunniit isummaminnik suli ersersitsisimanngillat.
Taamaaliortoqanngippammi, ataatsimiititaliami ikinnerussuteqartut isumaat avammut saqqummiussinernut ilaatinneqarsinnaanngitsut, Anda Uldum ilaatigut erseqqissaavoq, Air Icelandimik isumaqatigiissummut Olga P. Berthelsenip, Juliane Henningsenip namminerlu isummaminnik tusagassiutinut ataatsimoorlutik nalunaaruteqarnertik nassuiarlugu.
Inatsisartunut ilaasortat taakku pingasut, tassa Olga P. Berthelsen, Juliane Henningsen aamma Anda Uldum, tusagassiutinut nalunaaruteqarnerminni Inatsisartut ilisarnaataat atorlugu saqqummernerat, Per Berthelsenip aamma mamiatsaatigaa. Anda Uldumilli tamanna paasisinnaannginnerarpaa:
- Takusinnaanngilara sooq taama mamiatsatsiginersoq. Tamattami Inatsisartunut ilaasortaavugut uangalu isumaga naapertorlugu Inatsisartut ilisarnaataat atukuttoorsinnaavarput, Anda Uldum allappoq.
