Per Berthelsenip Inatsisartut tamakkerlugit suleqatigerusuppai
Aammattaaq Alcoamut atatillugu aningaasaliissutissatut siunnersuutaagaluartut 375 millioner koruunit, allanut atorneqarnissaat aamma misissorniapaa.
- Pingaartippara, ukiup tulliani aningaasanut inatsisissap partiinit tamanit peqataaffigineqartumik naapeqatigininniarnissamik anersaaqarluni ingerlanneqarnissaa, Per Berthelsen oqarpoq.
Alcoamut atatillugu aningaasaliissutissatut siunnersuutaagaluartut eqqarsaatigeqqinneqassasut aningaasanut naalakkersuisunngortoq oqarpoq.
- Alcoap suliffissuartut pilersinniarneqarnera uani sanngiillisarniarneqanngilaq. Kisianni misissoqqisaartariaqarpoq, 375 mio. koruuninik aningaasartuuteqarnissaq ilumut tunngavissaqarnersoq.
Utoqqalinersiutillit siusinaarlutillu pensionisiallit atugaasa pitsanngorsaavigineqarsinnaanerat aningaasanut naalakkersuisup aamma eqqarsaatigaa.
- Angorusupparput, nunatsinni aningaasakilliornerusut, soorlu pensionisiallit, inuuniarnikkut atugaasa pitsaanerulernissaat, aningaasanut nunanullu allanut naalakkersuisunngortoq, Per Berthelsen oqarpoq.
Per Berthelsenip Inatsisartuni ilaasortaanini attatiinnassavaa, naak naalakkersuisunngortut inatsisartutut sulinngiffeqarallartarnerat naliginaagaluartoq.