Berthelsen: KANUKOKA atorunnaassappat uggornassaaq
Qeqqatali Kommuniani borgmesterip, Hermann Berthelsenip KANUKOKA atorunnaarsinneqarnissaa uggoralugulu sanngiillisaanertut isigaa.
- Aallartisarniarnitsinni nukiit atorfissaqartippagut ataatsimoorluta suliaqarnissatsinnut, minnerunngitsumik qaammatialunnguit matuma siorna KANUKOKA-p siunissaa eqqartoratsigu, aammalu taamani Kommuneqarfik Sermersooq aniniarluni eqqarsarmat, kommunini nakuunissarput assigisaallu annertoorujussuarmik massakkut kommunit pingasuulluta isumaqatigiilluta ingerlakkaluarpagut, taamaammat tassuunartaatigut taanna uggoraara, Qeqqata Kommuniani borgmersteri Hermann Berthelsen taama oqarpoq.
Aamma atuaruk Kommunep KANUKOKA atorunnaarsinniaraa
Kommuneqarfik Sermersuup KANUKOKA-mit anisimaneraniit pissutsit atuutilersimasut attanneqarsinnaanngitsut, KANUKOKA-p siulittaasua, Palle Jeremiassen, aggustip aallaqaataani tunualersoq, oqarpoq.
KANUKOKA atorunnaarsinneqassappat allaffia Maniitsumut nuuneqarnavianngilaq, Hermann Berthelsenilli uggorinninni tamanna tunngaviginngilaa.
Taassumali tikkuarpaa, kommunit suliassanik amerlanerusunik tigusinissaat siunertaralugu isumaqatigiinniarnerit sukkatsinneqarnissaannik Naalakkersuisut siulittaasuat oqariartuuteqarnikuusoq.
- Tigusassagut pitsaanerpaamik suliarisinnaaniaraluaratsigit, nakuulluta taamatut immitsinnut sanngiillisaqqaarata, Hermann Berthelsen oqarpoq.
Aamma atuaruk KANUKOKA Maniitsumiissaaq
KANUKOKA-p Maniitsumut nutsernissaa qaammatini arlalinni piareersarneqarsimavoq.
- Piareersarsimavugut, allaffeqarfissaa assigiingitsullu qaammatini makkunani piareersarpagut, taamaammat taannartaa uagutsinnut uggoranartorujussuussaaq, borgmesteri oqarpoq.
Kommuni Kujallermi borgmesteri, Jørgen Wæver Johansen, KNR-imut e-mailikkut allappoq, KANUKOKA-p siunissaa siulersuisut aggustimi ataatsimiinnermi tulliani oqaluuserissagaat.