Per Berthelsen immikkut ittumik ataatsimiigiaqqusiniarpoq

Siulersuisuunerilli nalinginnaasumiit ikinnerupput, tassami siulersuisuunerni ilaasortat pingasut Nuummi demokraatit immikkoortortaanniit anisitaaqqammermata.

Per Berthelsen aperaarput immikkut ittumik ataatsimiigiaqqusinissamut suna siunertaanersoq.

- Siulersuisuunerni issiasunik pingasunik soraartitsisoqarnera ippassaq nalunaarutigineqarmat, siulersuisuunerni tassunga attuumassuteqanngitsut sinneruttut uanga ilanngullunga katilluta sisamaasugut katersortariaqarpakka, taamatullu soraarsitsineq nalilersorlugu, Per Berthelsen oqarpoq.

Taanna aperaarput qanoq oqaaseqarfigisinnaaneraa soraarsinneqartut pingasut Tasiilap immikkoortortaqarfianut ilanngullutik nalunaarsimanerat. Per Berthelsen illariarluni akivoq:

- Qungujuallappunga tassami tamanna piviusorsiunngilluinnarpoq. Tasiilaq ataatsimeersuarnermi peqataatinniaraluarakku itigartinneqarpoq, tassagooq ukiortaami aatsaat pilersinneqarnera peqqutigalugu, oqarpoq.

Taanna erseqqissaavoq Demokraatit pappialaataanni Tasiilaq suli ilaasortatut ilaasutut allassimanngitsoq.

- Taamaalillutik imminnut nassuerutigiinnarput, soraarsitsineq tusaatissatut tigusimagitsik akuerisimagitsillu. Uagullu malittarisassat malillugit ingerlaqqissaagut. Siulersuisuunerit nutaat arfineq-marlunngortillugit pilersinneqassapput avataaniilu piukkussanik ikkussissaagut, Per Berthelsen oqarpoq.

Taanna aperaarput iluminni aaqqiagiinnginneq qanoq ilillugu aaqqinniarsinnaaneraat.

- Uanga tunginningaanniit aaqqiagiinngittoqanngilaq, sumilluunniimmi uannut tunngasumik maalaarummik ukiuni tallimani tusagaqarsimanngilluinnarpunga. Taamaattumik una pisoq uannut naalliunnaqaaq aatsaammi misilinnginnakku kisianni tassa taamaattarsimagunarpoq siulittaasoqaraanni iluamik oqarsinnaasumik, tassami inuit ilaasa inissinneqarneq artortarpaat, taama oqarpoq demokraatit siulittaasuat Per Berthelsen.

Demokraatit Nuummi immikkoortortaaniit anisitaasut tassaapput: Jens B. Frederiksen, Astrid Fleischer Rex aammalu Karen M. Lynge.