Per Berthelsen ilaasortaajunnaarsitaavoq

Per Berthelsen ilaatigut ima allaffigineqarpoq.

- Demokraatit siulersuisuuneri tamarmiusut sinnerlugit matumuuna nalunaarutigineqassaaq, 2008-mi aggustip aallaqqaataaniit Demokraatinit ilaasortaajunnaartutit aalajangiunneqarmat. Ilaasortaajunnaarsitsinerup pisariaqalersimaneranut tunngavigineqartoq illit nammineerlutit tusagassiuutitigut nalunaarummi allassimasanni ingerlateqqissimasannilu allaqqavoq, siulersuisuunerit allapput, tulliullugulu Per Berthelsenip tusagassiuutinut nalunaarutaa, Demokraatit Inatsisartuni gruppeannit tunuarnerminik nalunaarutaa ilanngullugu nassiunneqarluni.

Siulersuisuunerit tikkuarpaat, Per Berthelsen arlaleriarluni tusagassiuutitigut avammut saqqummiussisarnermigut, Demokraatini ilaasortaanerminik nalorninartumik inissisimatitsilersimasoq kiisalu Demokraatinit ilaasortaajunnaaqqaarani partiinut allanut ilanngunniarluni qaninniartarsimanera. Taamatut periuseqarnera partimut ajoqutaasutut Demokraatit siulersuisuunerisa nalilerpaat.

Siulersuisuunerit aammattaaq isumaqarput, Per Berthelsen sapinngisamik nukini tamaasa atorlugit partimi eqqissiunnaarsitsiniassasoq, tassa politikikkut siumut isigisumik suleqataanani.

Ilaasortaajunnaarsitsilluni allakkat naggaserlugit, Per Berthelsen ilaasortaajunnaarsitaanerminik aalajangerneq partip 2008-mi septembarip 20-anni nalinginnaasumik ataatsimeersuarnissaanut naammagittaaliuutigisinnaagaa innersuussutigineqarpoq.