Per Berthelsen Demokraatini siulittaasuujunnaarpoq

Demokraatit Nuummi Hotel Hans Egedemi immikkut ittumik unnummut ataatsimeersuarmata siulittaasortik Per Berthelsen tunuartippaat, Jens B. Frederiksenilu siulittaasussamittut toqqarlugu.
Allattoq Mads Lynge
juulip 08-at 2008 20:11

Jens B. Frederiksen 14-inik taaneqarpoq, Per Berthelsen taaneaqanngitsoq. Taasinermilu taasissut ataaseq allaffigineqarani.

Partiip iluani upernaarli avissaartuunneqalermat taamatut pisoqarnissaa ilimanarsiartuinnarsimavoq.

Partiip politikkikkut nukittorsaqqinneqarnissaa Jens B. Frederiksenip suliniutiginiarpaa, nunattalu namminersulernissaa pillugu siulersuisuunerni piffissami tulliuttumi isummertoqarnissaa oqariartuutigalugu.

- Nunatta namminersulernissaa imaaliallaannarlugu akuerinavianngilarput. Oqallittariaqarpugut, alloriaqqinnissap tullia qanoq ittuussanersoq siunnissap takutikkumaarpaa, siulittaasunngorlaaq Jens B. Frederiksen oqarpoq.

Palle Christiansen Demokraatit politikkimi siulittaasup tulliattut kingumut qineqqinneqarpoq, Astrid Fleischer Rexilu aaqqissuussaanikkut siulittaasup tulliattut inissilluni. Karen M. Lynge partiip aningaaserisuatut qinerneqarpoq.

Inatsisartunut ilaasortaq Per Berthelsen, Demokraatillu Nuummi immikkoortortaqarfianni siulittaasoq Erik H.K. Heilmann ataatsimeersuarnermi peqataanngillat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq