Bertel Haarder: Josef Motzfeldt qallunaatut oqalussinnaanngilaq
Kalaallit Danmarkimi najugallit akiliillutik oqalutseqartarnissaat pillugu nutaarsiassaqartitsivimmut Ritzauimut kukkuluttungaatsiarluni taanna oqaaseqarsimavoq. Bertel Haarderilli qalleqqissarpaa, kalaallit qanorluunniit sivisutigisumik Danmarkimi najugaqarsimagaluarunik siunissami oqalutseqartarnissaat aalajangiunneqartoq. Bertel Haarder tassunga atatillugu ima nangippoq:
- Kalaallit Nunaanni siornatigut ministeriunerusimasoq JOSEF Motzfeldt Rigshospitalimi uninngagami qallunaatut oqalussinnaanngilaq. Aammami taamaassinnaavoq, kalaaliuvormi, Haarder Naalakkersuisut siulittaasuat pillugu nassuiaavoq.
KISIANNI ilisimaneqartutut Nunatsinni naalakkersuisut siulittaasoqarsimanngillat, Josef Motzfeldtimik ateqartumik.
Akerlianilli, maanna qanganngoreersoq, JONATHAN Motzfeldt, Naalakkersuisunut arlaleriarluni siulittaasuuvoq. Ilumoorporlu Rigshospitalimi uninngasimammat, kisianni ilisimaneqartutut qallunaatut oqallorissukasiuvoq.
Inatsisartullu siulittaasuat, Josef Motzfeldt, qallunaatut aamma oqallorippoq.
Naalakkersuisulli siulittaasorisimasaat, Hans Enoksen, qallunaatut oqalukkusuttorsuunngilaq, taannali Rigshospitalimi uninnganikuugunanngilaq, ilisimasavullu malillugit peqqilluarluni.
Peqqinnissaq pillugu Danmarkimi ministerip, Bertel Haarderip, Kuupik Kleist naapeqqikkuniuk kalaallisut ilinniartinneqarnissaminik immaqa qinnuivigisariaqassagaa?
