Berlusconip ajugaanera tupaallaatigineqarpoq
Berlusconip tunuarnissaa ilimagineqarsimagaluarpoq, sulili ataasiarluni paasinarsilluni Italiamiut ministeriunertik tapersersoraat.
Atoqatigiinnikkut assuarnartuliat, killilersuiniarneq pillugu unnerluussutit, peqquserlutsitsinerit peqquserluttuliornerillu.
- Italiamiut amerlaqisut naatsorsuutigisannguatsiarpaat politikerit tamarmik partiimik sorlermik tunuliaqutaqarnertik apeqqutaatinnagu peqquserluttuliortartut Italiallu soqutigisaaninngarnit namminneq soqutigisatik pingaarnerutillugit, taamaattumillu suliassarpassuit qinersisartut ilaannut immaqa pingaaruteqarpallaanngikkaluartut suliarisarlugit, Silvio Berlusconili inuttut allatut isigalugu. Politikeritut iliuuseqarsinnaasutut inussiarnersutullu Italiamilu politikerinit amerlaqisuninngarnit periarfissarsiullaqqinnerusutut parlamentimilu sulinermi aniguiniallaqqissutut isigaat, tamatumunngalu aamma ilaalluni Berlusconip taama isikkoqarnini tv-kkut tusagassiuutini pissaaneqarluinnarnermigut pilersissimammagu, Niels Kvale oqarpoq.
Tamatumunngalu peqatigitillugu Berlusconi aamma akerlerineqarluarmat, akerlerisaasa suut pillugit akerlerineraat Niels Kvale aperineqarami akivoq:
- Amerlaqisut inuttut unioqqutitsilluni siullermik tv-kkut kanalinik arlalinnik ujajaasimasutut kingornalu aatsaat tusagassiuutit atorlugit ministeriunertut qinigaasutut isigaat, taakkua inuttut naalakkersuisut illussaarsuanniigani parnaarusimasariaqaraluartutut aammalu iluaqutigissagaangamiuk imaluunniit imminut ajoqutaasussat pinngitsoortinniaraangamigit nangaariaallanngivilluni inatsisinik allanngortitsisinnaasutut isigaat, pingaaruteqarporlu oqaatigissallugu partiit marluinnaat qinersisoqarnerani siuartutuat kisimik Berlusconimik akeqqersimaarlutik isornartorsiuimmata, Niels Kvale naggasiivoq.
Berlusconi Italiami nunap immikkoortuinit 13-iusunit immikkoortuni arfinilinni ajugaavoq. Qinersisartut 64 procentii taasiartorsimapput - ukiuni 15-ini ikinnerpaallutik.
