Naggueqatigiit Inunneersoq toqutaasorineqartoq

Annie Pootoogook Canadami naggueqatigiit Inuit eqqumiitsuliortuini tusaamasaanersaat ilaanniippoq. Taanna Ottawami kuussuarmi Rideaumi toqungasoq sapaatit akunnerata siuliani nassaarineqarpoq, aatsaalli maannakkut kinaassuserneqarluni.

Annie Pootoogook ilaqutariinni eqqumiitsuliortuusuni Nunavummi Qeqertarsuarmi peroriartorpoq. Nunaqarfillu taanna naggueqatigiinnik Inunnik eqqumiitsuliortunik pikkorissunik najugaqarfigineqartutut tusaamasaavoq.

Eqqumiitsuliortartorlu maqaasineqassasoq, eqqumiitsulianik naliliisartoq, Andrew Hunter, CBC Newsimut oqarpoq. Pootoogook Canadami naggueqatigiit inuit eqqumiitsulioriaasaannut sunniuteqarluartorujussuuvoq.

Naggueqatigiit Inuit arnartaannut ullumi piviusut ersersinniartaramigit eqqumiitsuliamini unammillernartut nakuusernerlu sammisarpai. Pootoogookkillu eqqumiitsuliai kisimi Inuit eqqumiitsulioriaasiannut sunniuteqanngillat, kisianni aamma Canadami eqqumiitsulioriaasimut sunniuteqartoq, Andrew Hunterip oqaatigaa.

Pootoogookkip eqqumiitsuliai Canadap eqqumiitsulianik katersugaasiviani katersugaasivinnilu allani saqqummersinneqarput.

Suna toqussutigisimaneraa suli naluneqarpoq, politiilli toqutsinermut atatillugu maanna misissuipput.

Annie Pootoogook 46-innarnik ukioqarluni toqukkut qimaguppoq.