Benziina nunatsinni akitsussanngilaq
Benziina okton 95 ullumikkut Danmarkimi liter-imut 12,27 kr-neqartoq aqagu tallimanngornermi 12,39 kr-inut akitsussaaq.
Kalaallit Nunaani benziinap akiata taamatut annertutigisumik qaffannissaa isumakuluutigivallaassanngikkallarparput.
Kalaallit Nunaanni benziina liter-imut 4,47 kr-neqarpoq piffissamilu qaninnermi akitsornissaa naatsorsuutigineqanngilaq Polaroil-imi nukissiuutit pillugit pisortaq Peter Grønvold Samuelsen oqarpoq.
Piffissami qaninnermi uuliap benzinallu akii allannguuteqassanngillat, Polaroil-imi nukissiuutit pillugit pisortaq oqarpoq.
Taassuma erseqqissarpaa, kangiani qiterlermi eqqissiiviilliornerit pissutigalugit piffissami ungasinnerusumi orsussap akii nunatsinni allannguuteqarsinnaasut.
Nukissiuutit orsuussaasa akiisa qaffakkiartornerat piffissap ilaani Kalaallit Nunaanni malunniutiissapput, kisianni maannakkut allannguuteqassanngillat, uuliap benziinallu pisiarineqarnerini akinik sivisuunik atuuttunik pisisaratta, Peter Grønvold Samuelsen oqarpoq.
Uuliap akiata qaffarujussuarsinnaanera nunarsuarmi tamarmi ernummatigineqarpoq.
Kangiani qiterlermi eqqissiviilliornerit nunarsuarmi uuliamik pilersuisut annersaannut Saudiarabiamut anngussinnaanerat ernummatigineqarmat.
Benziinap akia qaffassagaluarpat 50 procentinik qaffassinnaavoq, tassalu literimut 20 kr-neqalersinnaalluni, uulia pillugu naliliisartoq Peter Rasmussen DR-imut oqarpoq.
