Bent Olsvig Jensen nutaamik pisortaaffeqalertoq
True North Gems Greenlandimi pisortaasimasoq Bent Olsvig Jensen, Xploration Services Greenlandimi pisortaaninngussaaq. Ingerlatseqatigiiffik nunatsinneersoq tusagassiuutinut nalunaarummi taama ilaatigut allaaserisaqarpoq.
Bent Olsvig Jensenip Xploration Services Greenlandimik pilersitsisoq maannalu pisortaaneq Martin Sandy Shalmi pisortaanertut kingoraassavaa, Shalmi pisortaanertut tunuarluni siulersuisuni siulittaasunngortussanngorluni.
- Bent Olsvig Jensenip atorfinitsinneratigut XS-ip sullissisinnaanera qaffappoq taamaammat misissuinermi suliffeqarfiit misissuinerit naammassiartorneranni aatsitassarsiornermut ikaarsaarnermut ikiorsinnaanngorlugit, Martin Sandy Shalmi tusagassiuutinut nalunaarutitigut oqarpoq.
Suliffeqarfimmi pisortaaninngortussap atorfinitsinneqarnini nuannaarutigaa, suliffeqarfiullu aatsitassarsiornermi pilersuisutut sullissinermilu pitsaalluinnartumik tatiginartumillu ingerlatsisartutut nalunnginneqarluartoq nammineq oqaatigalugu.
- Taamaammat XS-ip pitsaasumik ingerlanissaanut periarfissinneqarnera tulluusimaarutigaara, Bent Olsvig Jensen oqarpoq.
