Benazir Bhutto kingumut aneqqusaalerpoq

Lahoremi politiit Benazir Bhuttomik aneqqusinatik angerlarsimaffiata silataani paarsisut suli nikinngillat, maannali politiit pisortaata oqaasii malillugit, Bhuttop ajortumeerneqannginnissaa qulakkeerniarlugu paarsipput. Musharrafip Benazir Bhutto angerlarsimaffianit ulluni arfineq marlunni ippassaani aneqqujunnaaraluarpaa, sapaatillu akunnerisa arlaqanngitsut ingerlanerini aappassaa aneqqujunnaaraluarlugu. Ungasinngitsorlu tikillugu marluullutik suleqatigiinnissaat ilimagineqaraluarpoq. Bhuttolli Musharraf suleqatigisinnaajunnaarluinnarlugu nalunaarpoq, Karachimimi Bhuttomik illersuisut akerliussutsimik ippassaq takutitsineranni nukappissat marluk angullu toqutaammata pissutsit ajorteriarput. Pakistanimi pissutsit USA-mi ajuusaarutigaat, ajortumeerinianummi sorsunnermi USA-p Pakistan ikiortitsialattut isigigaluarmagu. Amerikamiut Musharraf avoqqaarinianngilaat, naak Musharrafip Pakistanimi sakkortuumik naalakkersuineq atuutsileraluaraa, taamaalillunilu nunap tunngavittut inatsisai atorunnaaarsikkaluarai. USA-p Nunanut Allanut ministeriata sinniisussaa, John Nikroponte, Pakistanimut ullumi tikissaaq, Musharrafillu tapersersortimi ilaat Naalakkersuisunut siulittaasunngortippaa, qinersinissap tungaanut naalakkersuisuusussanngorlugu.