Benazir Bhutto ilisaavoq

Nunatsinni nalunaaqutaq arfineq marlunngortoq Pakistanimi, Benazir Bhutto ilisaammat, inuit tusindillit perulluliornertaqanngitsumik iliseqataapput.

Benazir Bhutto illoqarfimmi najugaqarfigisimasamini ilisaammat inuit tusindillit aliasoqisut iliseqataapput. Benazir Bhutto ilaquttami iliveqarfianni, ataatagigaluami, 1979-imi naalakkersuisut siulittaasuattut uppisinneqarnermi kingorna toqumut pillarneqartup, sanianut ilisaavoq. Benazir Bhuttop uiata meeraasalu pingasut ilaqutariiginnaallutik ilisinissartik kissaatigisimagaluaraat misiginneqataasut tusindillit, ilarpassui partiimik qalipaataannik, qernertumik, qorsummik aappalaartumillu qalipaatilinnik erfalasulisartut iliseqataapput. Benazir Bhuttop toqutaanerata kingorna inuit 20-t missaaniittut toqutaareerput, nunallu immikkoortortaani Bhuttop najugaqarfigisimasaani politiit perulluliorniartunik toqutsinissaannut peqquneqarput, politiillu naalagaat oqarpoq perulluliortoqalissagaluarpat eqqissisaanissamut politiinik inuttassaqaratik. Pakistanip avannarpasinnerusortaani præsident Musharrafip partiianeersut pingasut, ilaat ataaseq inatsisartunut qinigassanngorteqataasoq qaartartumeerinikkut toqutaapput, illoqarfimmilu Haede Rabat-imi inuit tallimat politiinit ikilerneqarsimapput. Præsident Pervez Musharraf ulluni pingasuni nunami aliasunneqarnissaa nalunaarutigalugulu inuit eqqissisimaniarnissaat kaammattuutigigaluaraa inuit puullutik biilinik ikuallaaqattaarput pisortallu illuutaannik sequteralutik. Politikerit naalakkersuisunut illua-tungiliuttut suni tamani suliumajunnaartoqarnissaa ullunilu 40-ni nunami aliasuttoqarnissaa siunnersuutigisimavaat. Pakistanimili naalakkersuisut siulittaasuat nalunaarpoq ullut qulit qaangiuppata qinersisoqarnissaanik pilersaarut allanngortinniarnagu, naak illua-tungiliuttut allat siulittaasuat Nawar Sharif, qinersinissaq pilersaarutaasutut ingerlanneqassappat nammineq qineqqusaassanani nalunaaraluartoq.