Belgiami malittarisassaq: Angerlarsimaffinni juullisiorit ataasiinnarmillu qaaqqusillutit
Belgiami naalakkersuisut coronap ajornartoortitsinerani killilersuinerit juullilerneranut atatillugu ippassaq tallimanngornermi allannguilaarput.
Allanngortinneqartut ilaat tassaavoq inuit kisimiittut juulliaqqami juullerujussuarmilu marlunnik ataatsikkut pulaartoqarsinnaalersut. Killilersuinerit massakkut atuuttut naapertorlugit kisermaat ataasiinnarmik pulaartoqaqqusaapput. Brussels Times taama allaaserisaqarpoq.
Belgiami innuttaasut ataatsimut isigalugu angerlarsimaffimminni juullisioqquneqarput. Inoqutigiit ataatsimik pulaartoqaqqusaapput.
Assersuutigaluguli naatsiivimminni pisussatut aaqqissuisimagunik sisamanik pulaartoqaqqusaapput.
Belgiami pisiniarfiit assigiinngitsut decembarip aallaqqaataanit ammarsinnaanngussapput, assersuutigalugu atisaarniarfiit ammarsinnaassallutik.
Killilersuisoqassaarli. Tassami pisiniartoq ataaseq taamaallaat 1 kvadratmeterimiissinnaatitaassammat. Belgiami oqartussat kisimiilluni sukkasuumillu pisiniartoqartassaaq, asulilu pisiniarfimmiittoqaqqusaanani.
Neriniartarfiilli, caféet nujaleriffiillu februaarip aallaqqaataata tungaanut matoqqagallassapput.
Ukiortaarsiornissallu aamma killilersuiffigineqarput, tassami qummoroortarneq ukioq manna aamma inerteqqutigineqassammat.
Belgia Europami nunani coronavirusimik eqqorneqarnerpaanut maanna aamma ilaalerpoq, ukiap tunillatsittut ukiaanerani amerliartuinnavissimallutik.