Tyrkiami Syriamilu ajunaarsimasutut nalunaarsorneqartut 22.000-ngajanngortut
Inuit 22.000-ngajaat Tyrkiap kujasissortaani Syriallu avannarpasissortaani nunap ataasinngornermi ullaassakkut sajorujussuarnerani ajunaarsimanissaat 75.000-niillu ikinnerunngitsut aqqunartitersimanissaat missiliorneqarpoq.
Tyrkiamimi Syriamilu nunap sajunnerani ajunaarsimasutut maannamut nalunaarsorneqarsimasut 22.000-ngajaapput.
Tyrkiami ajunaarsimasutut nalunaarsorneqartut katillutik 18.500-ngajaanerat paasinarsereersorlu, Tyrkiami Syriamilu ajunaarsimasutut nalunaarsorneqartut maanna tassa 22.000-ngajanngorput.
Tyrkiami ajunaarnersuaqartillugu oqartussat, Afad, tallimanngornermi ullaakkut taama nalunaaruteqartut, nutaarsiassaqartitsivik Reuters allappoq.
AAMMA ATUARUK 8700-nit ikinnerunngitsut Tyrkiami Syriamilu nunap sajunnerani ajunaartut
Inuit 3400-ngajaat Syriami ajunaarsimasutut maannamut nalunaarsorneqartut, nutaarsiassaqartitsivik DPA allappoq.
Tyrkiami Syriamilu ajunaarsimasut katillutik tassa 22.000-ngajaapput.
Tyrkiami aqqunartitersimasut 75.000-t missaanniittut, ajunaarnersuaqartillugu ataqatigiissaarisut Afad ilisimatitsipput.
Tyrkiap kujasissuani Syriallu avannarpasissortaani innuttaasut amerlanerit ataasinngornermi ullaassakkut nalunaaqutaq sisamat qaangerlugit tanneq sisamat missaanni sinnguttut nuna siullermik sajorujussuarpoq. Nuna Richterip nunap sajuttarneranik uuttuutaa naapertorlugu 7,8-mik sajuppoq. Nunap immikkoortuani pineqartumi nuna sakkortuumik kingorna aamma sajuttaqattaarpoq.
Tassami nuna 1000-riarluni sinnerlugilluunniit kingorna sajuttaqattaarpoq.