Beirutimi mittarfik qaartartumeerneqartoq
Libanonip illoqarfiisa pingaarnersaanni Beirutimi mittarfik Israelimiut timmisartuutaannit ullaaq manna qaartartumeerneqarpoq.
Tamanna pissutigalugu timmisartut Beirut-iliartut Kangiani Qiterlermi mittarfinnut allanut sangutinneqarput.
Mittarfik rakettinik pingasunik eqqorneqarpoq, timmisartullu marluk allamukartinneqarlutik. Kinguninngua mittarfik matuneqarpoq. Mittarfimmi sulisut taama ilisimatitsipput.
Libanonip kujasinnerusortaani aamma saassussisoqarpoq. Tassani rakettinik saassussisoqarmat, inuit 20-t toqutaapput. Palæstinamiut isumannaallisaaniartartui nutaarsiassaqartitsivimmut Reuters-imut taama ilisimatitsipput.