Aataa qaammatip affa inuilaarsuarmeereerluni angerlamut tikippoq
Egor Tarasov septembari aallartisimalaartoq aallarpoq, suli aasaasoq, umiatsiamik Jakutienimi Kolyman kuuatigut. Sibiap avaanaata kangianiippoq. Ilimangineqarsimanngilaq qaammatip ataatsip affaatalu ingerlanerani aatssat angerlamut apuutissasoq. taama The Siberian Times allappoq.
Egor Tarasovimik ujaasineq aallartippoq umiatsiamik angalaarluni ulloq taanna tikinngitsoormat. Piffissap sivikitsup iluani umiatsiaa nassarineqarpoq, kisianni inuttaqanngitsoq. Sila nillertikkiartulereermat aataamut nillerpallaalersinnaavoq tassami aataa oqorsaateqarani aallarsimavoq aammami aasarmanna silaannaq kiassimaqigami.
Nannut amaqqullu akornanni annassimavoq
Uterrernermi kingorna nassuiaasivoq, putsumik tammartajaarsimalluni aammalu orsuerussimalluni. Siullermik Egor Tarasov umiatsiamiiginnarsimagaluarpoq ikiortissanik utaqqilluni. Takkuttoqanngimmat, aalliangersimavoq inuilaarsuakkut ingerlasariaqarluni nannut amaqqullu najugarfiat aqqusaarlugu.
51-inik ukiulik tuttunik paarsisartuusoq sapaatit akunneri arlallit inuilaarsuarmi ingerlaarsimavoq – kaavikajaarluni, tassami apisimariarmat sammiveeruttarsimagami septembari naalersoq apisimagami. Aperiarmat nillertippallassimavoq, allatullu ajornartumik uninnaveersarluni ulloq unnuarlu qiussanngikkuni ingerlaartuarsimavoq., taama The Siberian Times allappoq.
Oktoberi ingerlasimalereersoq kiisami sapaatip akunneri arlallit qaangiuttut illuaraq kuup eqqaaniitoq tikissimavaa, aalisartumik pigineqartoq, tassanilu oqqissinnaalersimalluni. Nerisimavoq imermillu kissaasimalluni. Ullorlu 14.oktobari illuaqqamik piginnittoq takussimavoq Egor Tarasovilu nassaaralugu.
Silaannakkut attaveqaatikkut oqartussaasut attavigisimavai, taannalu 51-inik ukiulik tuttunik paarsisartoq illoqarfimmut Cherskymukaassimavaa, tassani napparsimavimmut unitsinneqarsimavoq. Kingornalu nulii qitornanilu takoqqissimallugit.
Russit nutaarsiassaqartitsiaviata allaaseraa, Egor Tarasov 120 kilomiiterit pisussimagai, ingerlavia siaarlugu naatsersussagaanni. Ilimagineqarporli suli takinerusumik pisussimasinnaaneraa, kaavilukaarluni sumiiffeqarani ingerlaarsimagami.