BBC piviusulersaarummik isiginnaagassiorpoq
Ukiut 21-it qaangiupput umiarsuaq uuliamik assartuut, Exxon Valdes Alaskap sineriaani kangerliumanermi Prince Williamsip kangerliumarngani ikkarlilluni uulia million litererpassuarnik annertutigisoq imaanut maqitimmagu. Uuliamik mingutsitsineq taanna siorna upernaakkut Mexicop kangerliumarngani maqisoorneq pinngikkallarmat annersaavoq.
Taamani ukiut 21-it matuma siorna ajutoornermi ullut tamaasa takutinneqartarput aalisakkat timmissallu uuliarluernermik qallikkat. Taamani Exxonip mingutsitsinermi uumasunut ajutoortunut aningaasat 11 milliard koruunit atorpai, kisianni tassa maanna suli takussaapput, aammalumi piviusulersaarummi takutinneqarlutik, sinerissami ujaqqat akornanni uulia suli ajornartorsiutaasoq.
Taamani ajutoornermi Exxonip aalisartunut aammalu allanut immakkut inuussutissarsiutilinnut, taarsiissutigai aningaasat katillugit 6 milliard koruunit.
Alaskap avannaani maanna, ilaatigut uuliasioqatigiiffissuaq Shell, uuliamik qalluiniarluni utaqqiinnarpoq. Tamannarpiarlu tunngaviagalugu TV-qarfissuaq BBC piviusulersaarummik isiginnaagassiorniarluni Alaskap avannaaliarsimavoq, uuliamik mingutsitsinerup suut akornusersimanerai takusassiariniarlugu. Aalisartut nunallu inoqqaavi Inuppiaat BBC-mit oqaloqatigineqarsimapput, taakku oqarput taamani ajutoornerup kingorna pisinnaasartik tamaat atorlugu uumasunik annaassiniarsimagaluarlutik, pinngortitarli pissusissamisut ikkunnaarsimasoq taakku oqaatigaat.
Alaskap avannaani uuliasiornissat tamaasa maanna USA-p præsidentiata, Barack Obamap unitsikkallarsimavai, taamaakaluartorli uuliasioqatigiiffissuaq Shell neriuppoq aasartinnagu uuliamik qillerisoqarlersinnaassasoq.
Alaskami innuttaasut maanna oqallisigaat, ilumut uuliamik tamaani qalluisoqaqqilissanersoq, ukiut 21-it matuma siornatigut pisup qanoq mingutsitsisimatiginera suli inunnik eqqaamaneqaqaaq. Apeqqutaaginnarlerporli inuit isumaat tusarniarneqassanersut, tamannami ilimaguineqanngilaq.
