BBC: Pituffiup eqqaani suli brintbombeqarpoq
Timmisartup nakkarnerata kingornagut kalaallit piniartut danskillu sulisartut saliitinneqarput. Timmisartup ilaminikui aamma nakkarfiata eqqaani aputip qaava katersorneqarput allamukaassorneqarlutillu. Katersuinerup kingornagut paasineqarpoq amigaateqartoqartoq, tassami qaartartut pingasuinnaat nassaarineqarmata, naak timmisartoq qaartartunik sisamanik usigaluartoq.
brintbombit sisamaat Amerikamiut aqqartartumik ujaarigaluarpaat, kisianni nanisimanngikkaat allakkani manna tikillugu isertuussaasimagaluartuni takuneqarsinnaavoq. Amerikamiut ujaasigaluarnertik naggataagut taamaatiinnarpaat. Tassa qaartartup allanit nassaarineqarsinnaanera ilimananngitsutut aamma qinngornerit ulorianartut immamit ulorianarunnaarsinneqartussatut nalilerlugit.
Allakkani isertugaatini aamma takuneqarsinnaavoq, Amerikamiut brintbombe immap naqqani tammaaneqartoq, nunanut allanut ilisimatitsissutiginiarnagu aalajangiisimasut, tassa danskit oqartussaasui aamma ilisimatinneqassanngitsut.
Pituffimmi sulisartuusimasut brintbombit sisamaqarnerarlugit siusinnerusukkut oqaatigisarpaat, paasissutissallu nutaat ersersippaat tamanna ilumoortortaqartoq.
Amerikamiut illersornissamut oqartussaasuisa BBC-imit paasissutissiissutigineqartut oqaaseqarfigerusunngilaat.
