Basketball-ertarfik takornariat akileeqataaffigaat
Illoqqortoormiuni basketball-ertarfimmik sanasoqarpoq pilersinniarneralu umiarsuarsuarnik takornariat akileeqataaffigaat.
Tamanna takussutissaavoq umiarsuarsuarnik takornariartartut akornanni eqqarsariaasiulersumut tassami tikitaminni takornariat iluaqutaarusupput, taama ilisimatitsivoq Malik Milfeldt Kalaallit Nunaanni takornariartitsinermut inuussutissarsiornermullu siunnersuisooqatigiinni GTE-mi atorfilik.
Eqqarsariaaseq taanna Illoqqortoormiuni iluaqutigineqalereerpoq meeqqanut inuusuttunullu sunngiffimmi sammisaqartitsinermi atortut pilersinniarneranni.
- Umiarsuarsuarnik takornariat tikissartik sioqqullugu tusaamalersimavaat basketball-ertarfimmik sananiartugut. Umiarsuarmi akitsorterussisoqarsimavoq aningaasallu isertinneqartut basketball-ertarfiliorniarnitsinnut tapiissutitut tunnuniunneqarlutik, taama KNRimut oqarpoq Illoqqortoormiuni Nanu Travel-imeersoq Karina Bernlow.
Basketball-ertarfittaaq 100.000 koruuninik akeqarsimavoq takornariallu aningaasat tunissutaat aningaasartuutit sisamaraarterutigaat. Kommuneqarfik Sermersooq aamma pilersitsiniarnermi aningaasaleeqataavoq.
Siullermeerutaanngilarli Illoqqortoormiuni pilersinniakkanut takornariat aningaasaleeqataanerat.
- Umiarsuarsuarnik takornariat aamma aningaasaleqataanikuupput ukiut tallimat matuma siorna pinnguartarfimmik sanasoqarnerani. Taamanikkut aningaasartuutit affaat takornariat tapiissutaannit matussuserneqarput, taama Karina Bernlow unnersiorpoq.
Illoqqortoormiut siorna umiarsuarsuarnit takornariartaatinit 16-init tikinneqarput ukiuni siuliini 20-it missaannit tikinneqartarsimallutik.
- Umiarsuarsuit angerlamut saannginneranni uniffiit kingullersaraatigut. Taama pisoqartillugu umiarsuarsuit nerisassanik maani innuttaasunut tunissuteqartarput utoqqaat angerlarsimaffiat, atuarfik napparsimmavillu nerisassanik tunineqartarlutik. Umiarsuarsuit ilaasa aamma illoqarfimmi utoqqartaasut ilaatittarsimavaat kangerlummut Kangertittivarmut ingerlaleraangamik, taama oqaluttuarpoq Karina Bernlow ukiut 14-it Illoqqortoormiuni najugaqarsimasoq.
