Bashra Irakimiut akisussaaffigilerpaat

Tamanna tuluit sakkutooqarfianni persuarsiornartumik pivoq:

- Bashrap akeraannut akiuukkiartorlunga maannarpunga, maannalu Bashra pisortatigoortumik kammalaatinut tunniuppara, taama oqarpoq tuluit sakkutuuisa qullersaasa ilaat Graham Binns.

Tamatuma kingorna Bashrap guvernøria peqatigalugu pappilissat tunniussinermut tunngasut atsiorpai.

Taamaalilluni Irakimi nunap immikkoortuinit 18-iusunit qulingiluat Irakimiut naalakkersuisuinit akisussaaffigineqalerput, maannalu Irakimiut sakkutuuisa Bashra-mi isumannaatsuunissaq nakkutilliinissarlu akisussaaffigilerpaat.

Maannali apeqqutaalerpoq kikkut Bashra-mi aqutsisunngornersut, tassami siusinnerusukkut nalunaarusiani oqaatigineqarpoq, Bashrami arnat ilungersunartorsiornerulersimasut. Tassagooq arnat kitaamiorpaluttunik atisallit upperisarsiortunit ingasattajaarnianit sakkulersorsimasunit saassunneqartarmata, qunusaarneqarlutik toqunneqartarlutillu.

Bashrami politiit pisortaata siusinnerusukkut oqaatigereerpaa, upperisarsiortut ingasaassiniat naapertorlugit arnat 43-t kukkusumik atisalersorsimasut qaammatit pingasut ingerlanerinnaani toqutaasimasut.

Taamaattorli Bashrap guvernøria ullumi nuannaaqaaq, qularnanngitsumillu Bashramiut amerlanerit nuannaaqataapput, tassami isumasiuinerit ersersimmassuk tamaani innuttaasut 85 procentii isumaqartut Tuluit sakkutuui pissutsinik ajornerulersitsiinnartut.

- Ullumikkut Bashramut pingaarutilimmik pisoqarpoq, guvernøri oqalugiarnermini ilaatigut oqarpoq.