Barentsip imartaani saarullippassuit
Ukiuni kingullerni 40-ni Norgemiut aatsaat taama saarullinniartigisussanngorput. Nunat tamalaat imaani ilisimasassarsiortuisa, Barentsip imartaa 3,5 millionit tonsinik saarulleqarnissaa missingersorsimavaat.
Barentsip imartaani saarullittassat Norgemiut Russillu ataatsimoorullugit aqutaraat, saarullittassallu aalajangersorneqartarlutik nunat taakku marluk ukiakkut ataatsimeeqartigiinnerminni.
Ilisimatuut innersuussutaat malinneqassappata, Norgemiut aalisartuisa 400.000 tonsinik aappaagu saarullittassinneqarnissartik naatsorsuutigisinnaavaat.
- Saarullittassat iluaqutaassaqaat. Tassami nunami aalisakkeriviit ulappunnerinik tamanna kinguneqartussaavoq, suliffeqarfippassuarnik pilersitsitsissallutik aningaasarsiutaassallutillu, Norgemiut aalisarnermut ministeriat, Lisbeth Berg-Hansen nutaarsiassaqartitsivimmut NTB-mut taama oqarpoq.
Ilisimatuut ukiumiit ukiumut pisassiissutinik taamarsuaq amerliliisarneri nalinginnaanngilluinnarpoq.
- Pinngortitarsuup iluaquserpaatigut, saarullittassalli siornatigut pisassiissutigisartakkavut mianersortunnguamik pisassiissutigisaratsigit tamanna iluaqutaavoq. Tassami saarulleeqqat eqqissisimatinneqartarnerat, suffisartut amerlanerulernerinik kinguneqarmat, ilisimatooq Bjarte Bogstad, Norgemi imaani ilisimatusarnermut institutimeersoq oqarpoq.
