Barentshavimi saarulliit aatsaat taama amerlatigipput

Barentshavimi unioqqutitsilluni aalisarnerup akiorniarneqarnerata malitsigisaanik saarulliit amerliartoqqilerput, Danmarkip Radiuata nittartagaani tamanna atuarneqarsinnaavoq.
Allattoq Louise M. Kleemann
januaarip 13-at 2009 08:55

Saarulliit suffisartut Barentshavimiittut ukiut qulikkaat arlallit ingerlaneranni aatsaat taama amerlatigipput. Piujuaannartitsinissaq tunngavigalugu aalisartoqarsinnaalersoq, Imavinni misissuinerit pillugit nunat tamalaat siunnersuisartoqatigiiffiata, ICES-ip erseqqissaatigaa.

Barentshavi Norgip Kolallu qeqertaasaata avannaaniippoq, nunarsuarmi saarulleqarnerpaaffiusumi.

Unioqqutitsilluni aalisarnermik unitsitsiniarluni suliniarluarneq maanna takussutissaqalerpoq. ICES-ip nalunaarutaa naapertorlugu unioqqutitsilluni Barentshavimi saarullittat 2005-imi 166.000 tonsiupput 2007-imilu 40.000 tonsiullutik.

Pinngortitaq pillugu nunarsuaq tamakkerlugu suliniaqatigiiffiup WWF-ip tusagaq nuannaarutigeqigaa, Norgimiut nutaarsiassaqartitsiviata NTB-p allaaseraa.Taamaammat pisisartut ilerasuuteqaratik saarullinnik Barentshavimeersunik pisisinnaalersut WWF isumaqarpoq.

Kalaallit Nunaat aamma Norge Barentshavimi aalisarsinnaaneq pillugu siorna decembarip qaammataani isumaqatigiissuteqarput, ilaatigullu saarullittassiisoqarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq