Barentshavimi aalisarsinnaaneq pillugu isumaqatigiissusiortoqarpoq
Norgep imartaani Barentshavimi ukioq manna aalisarsinnaaneq pillugu Kalaallit Nunaat Norgelu isumaqatigiissusiorput. Pisassarititat pillugit tallimanngormat januaarip 15-iani isumaqatigiissusiortoqarpoq. Kalaallit Nunaata Barentshavimi saarullittassai amerlineqartut, Norgep aalisarnermut ministereqarfiata nalunaarutigaa.
Allattoq Mads Lynge
januaarip 17-at 2010 13:16
Saarulliit ilaannik kullerinik pisassiissutit siorna 360 tonsioriarlutik ukioq manna 630 tonsiupput.
Saarulliilli arlaannik sejinik pisassiissutit amerlinerungaatsiarput. Taakkununnga pisassiissutit siorna 270 tonsioriarlutik, ukioq manna 1000 tonsiupput.
Saniatigut pisaat aamma 360 tonsiusinnaanissaat isumaqatigiissutigineqarpoq.
Norgemiulli oquuttakkut ilaannik amerlanerusunik pisassinneqarput. Tassa katillugit 900 tonsinik pisassinneqarmata, siornamut naleqqiullugu 28,5 procentinik pisassinneqarnerullutik.
Suluppaakkat katillugit 700 tonsit Norgemiut ukioq manna pisarisinnaassavaat, saniatigullu pisaat 150 tonsiusinnaallutik.
