Barack Obamap Hillary Clinton qaangerpaa
Qinigassanngortinniunnermut atatillugu ippassaq qinersinerni pingasuusuni Obama naalagaaffinni pingasuni ajugaassangatinneqarpoq, tassa Virginiami, Marylandimi illoqarfiillu pingaarnersaanni Washingtonimi Demokraatit taasisaasa 75 procentiinit qinerneqarsimalluni. Qinersinerup kingorna Obama oqalugiarami ”pissaanerup katersuuffia”-ni, tassa illoqarfiit pingaarnersaanni ajugaanini attortisimassutigaa.
- Naak Washington DC-mi ajugaagaluarluta uniinnassanngilagut, tassami Washingtonimi allanngortitsinissaq anguniarparput, tamannalu ornipparput, Obama nuannarinnitsiminut nuannaaqaluni taama oqarpoq.
Naalagaaffinni pingasuusuni Republikanerit qinigassanngortitsiniarnermut atatillugu aamma ippassaq qinersipput. Taakkunani Senatimut ilaasortaq John McCain ajugaavoq, taamalu novembarimi præsidentissarsiorluni qinersinissamut Republikanerit qinigassanngortitassaattut siuartuulluni.