Barack Obama siullermeerluni oqalugiarpoq
Piffissanngorpoq nunarsuup tunaartamut nutaamut alloriarnissaanut. Ataatsimoorussamik soqutigisagut aammalu ataqqeqatigiinnerput aallaavigalugit piffik nutaaq ammaattariaqarparput, sulinerpullu maannakkut aallartittariaqarparput, præsident Obama oqarpoq
Oqalugiarneq pitsaalluinnartumik tiguneqarpoq taassumalu , USA-mi DR-ip ilanngutassiortua Steffen Gram malillugu, nunap pissaanilissuup nipit nutaajulluinnarlutillu ikinngutinnersut Naalagaaffiit Peqatiinnut nalunaarpai.
Pitsaalluinnartumik tiguneqarpoq, tassami ukiuni arfineq-pingasuni qaanngiuttuni nipimit sungiusimasatsinnit USA-mit saqqummiunneqartartumit allaanerulluinnarpoq. Matumani pitsaaqutaavoq nunat amerlasuut akuutinneqarnissaat Barak Obamap pingaartilluinnarmagu, soorlulusooq USA Naalagaaffiit Peqatigiinnut ilanngutseqqikkaa.
Tassami ataatsimooqatigiinnut ilaaqqilerpugut allaat akiligassavut akilerpavut. Taamaammat tamatta ataatsimoorluta ingerlasariaqarpugut siunissarlu ataatsimoorluta akisussaaffigaarput, isummatta malinneqarnissaat kimigiisissutigissanngilarput sunniiniarnatalu. Tamat oqartussaaqataanerat kiffaanngissuseqarnerlu matumani pineqarput, kisianni Naalagaaffiit Peqatigiit aqqutigalugit ingerlanneqartariaqarput. Isuma nutaaq taama USA-mit aninneqarpoq.
Obamammi Netanyahu aamma Mahmoud Abbas ataatsimeeqatigisimavai. Kangia Qiterleq pillugu isumaqatiginninniarnerit ingerlariaqqinnissaannut siunnersuummik septembarimi saqqummiussisoqartussaagaluarpoq. Taamaammat eqqissineq anguneqassappat illuatungeriit isumaqatigiinnginnermi matumani nikeriarnissaat Obamap tamaviaarutigaa, Israelimiuinnaanngitsut, palæstinamiuinnaanngitsut kisiannili aamma nunat palæstinamiunut tapersersuisut.
Afghanistanimut atatillugu amerikamiut periutsiminnik maanna tamakkiisumik nalilersuinerat Afghanistanip eqqaaneqannginneranut patsisaagunarpoq.
Afghanistanimi qinersineq ingerlanneqaqqammersoq annertuutigut peqquserluuteqarfiusoq immaqalu Karzai-p ajugaasuuneranik nalunaaruteqarfiusussaq amerikamiunik assut aalassatsitseqqavoq. USA Afghanistan pillugu siunissami qanoq periuseqassanersoq eqqartorneqarallarpoq taamaammat Afghanistani oqalugiarnermi eqqaaneqarpianngilaq.
