Bank Nordikip sinneqartoorutini sisamariaatinngortippai
Siorna ukioq Savalimmiormiut aningaaseriviannut ukiuuvoq pitsaasoq. Akileraarutit sioqqullugit sinneqartoorutit katillugit 121 millionit koruuniupput, 2011-mi 31 millionit koruuniusimallutik.
Aningaaseriviup taama angusaqarluarneranut Nunatsinni aningaaserivinnik ingerlataqarnera pissutaaqataalluinnarpoq.
Nunatsinni iluanaarutit akileraarutit sioqqullugit 14 millionit koruuniupput aamma atukkiussat 171 millionit koruuninik amerleriarsimallutik. Taamaalilluni Nunarput tassaalerluni BankNordikip 2012-imi angusarissaarnerunerpaaffia.
- Sullissavut amerliartuinnavipput. Kalaallit Nunaanni aningaaseriveqarnermi BankNordik periarfissatut nutaatut isigineqarpoq, BankNordikip Nunatsinni pisortaa Bjartur Nolsøe oqarpoq.
Naak aningaaseriviup sinerissami ingerlatani matullugit, Nuummut katersoraluarai 2012-imi taama siuariartoqarpoq.
- Atuisut annerujartuinnartumik aningaaserivitsigut imminut sullissinermik atuileriartorput aamma akiliutinik atuisoqarnerulerluni. Taamaattumik immikkoortortaqarfinnik pisariaqartitsineq minnerulerpoq, tamatumunngali taarsiullugu pitsaanerusumik siunnersorneqarnissamik pisariaqartitsisoqarluni aamma ulluinnarni aningaasanik atuinermut atatillugu, Bjartur Nolsøe oqarpoq.
BankNordikip ingerlatamini allani taama ingerlaannarnissani appariaateqalaarnisaaluunniit naatsorsuutigigaluarlugu 2013-imi Nunatsinni aningaaseriveqarnikkut ingerlatamini siuariartuinnarnissani naatsorsuutigaa.